Ломбардтардың қызметі «Микроқаржылық қызмет туралы» ҚР Заңымен және ҚР өзге де заңнамалық актілерімен реттеледі.

Ломбард акционерлік қоғамның немесе шаруашылық серіктестіктің ұйымдық-құқықтық нысанында құрылады.

Ломбардтың атауында міндетті түрде «ломбард» сөзі болуға тиіс.

Заңды тұлға «Азаматтарға арналған үкімет» мемлекеттік корпорациясында ломбард ретінде мемлекеттік тіркелген (қайта тіркелген) күннен бастап алты ай ішінде микроқаржылық қызметті жүзеге асыруға лицензия алу үшін уәкілетті органға (Қазақстан Республикасының Қаржы нарығын реттеу және дамыту агенттігіне, бұдан әрі – Агенттік) жүгінеді.

Ломбард ашуға ниеті бар заңды тұлға Агенттікті, қаржылық мониторингті жүзеге асыратын уәкілетті мемлекеттік органды осы тіркелген күннен бастап күнтізбелік он күн ішінде «Азаматтарға арналған үкімет» мемлекеттік корпорациясында ломбард ретінде мемлекеттік тіркеу (қайта тіркеу) туралы хабардар етеді.

Лицензия беру тәртібі, ломбардтың басшы қызметкерлері мен құрылтайшыларына (қатысушыларына) қойылатын талаптар, сондай-ақ заңды тұлғаға лицензия беруден бас тарту негіздері «Микроқаржылық қызмет туралы» ҚР Заңында белгіленген.

Ломбард қызметін жүзеге асыруға лицензия алу (қайта ресімдеу) үшін «Рұқсаттар және хабарламалар туралы» ҚР Заңында айқындалған құжаттардан бөлек ломбард Агенттікке микроқаржылық қызметті лицензиялау қағидаларында айқындалған жағдайларда ломбард қызметін лицензиялау кезінде қойылатын біліктілік талаптарына сәйкестігін растайтын құжаттарды ұсынады.

Лицензиялау қағидаларына (Агенттік Басқармасының 23.11.2020ж. №108 қаулысы) сәйкес ломбардтың өз қызметін жүзеге асыруына лицензия алу үшін өтініш беруші Агенттікке лицензия беру туралы өтініш пен тиісті құжаттарды ұсынады. Құжаттар «электрондық үкіметтің» www.egov.kz және www.elicense.kz веб-порталдары арқылы электрондық түрде беріледі.

Ломбард лицензия беру туралы өтініште міндетті түрде мынадай біліктілік талаптарының орындалуы туралы мәліметтерді көрсетеді:

- бухгалтерлік есеп жүргізуді автоматтандыруды қамтамасыз ететін ақпараттық жүйенің болуы;

- қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл саласындағы бірыңғай ақпараттық жүйеге қосылу;

-мемлекеттің қатысуымен кредиттік бюроға ақпарат беру туралы шарт жасау.

Өтініште осы мәліметтерді көрсету ломбардтың өтініш бергенге дейін қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл саласындағы уәкілетті органмен және кредиттік бюромен өзара іс-қимыл жасауға мүмкіндік беретін, оның ішінде, талап етілетін ақпараттық жүйелердің болуын және олардың қызмет етуін қамтамасыз еткенін білдіреді.

«Пруденциялық нормативтердi және микроқаржылық қызметті жүзеге асыратын ұйымның сақтауы мiндеттi өзге де нормалар мен лимиттердi, оларды есептеу әдістемесін бекіту туралы» Қазақстан Республикасы Ұлттық Банкі Басқармасының 2019 жылғы 14 қарашадағы № 192 қаулысында ломбардтың жарғылық капиталының ең төменгі мөлшері айқындалған. 

Агенттік ұсынылған құжаттардың, сондай-ақ біліктілік талаптарына сәйкестікті, оның ішінде ломбардтың басшы қызметкерлері мен құрылтайшыларының (қатысушыларының) біліктілік талаптарына сәйкестігін растайтын мәліметтердің толықтығын (жоғары білімі мен мінсіз іскерлік беделінің болуы, өтелмеген немесе алынбаған соттылығының, сыбайлас жемқорлық қылмыстарының болмауы) тексеруді жүзеге асырады.

Мемлекеттік қызметті көрсету нәтижесі құжаттардың толық пакетін алған күннен бастап отыз жұмыс күні ішінде Лицензия беру туралы хабарламаны немесе оны беруден уәжделген бас тартуды жіберу болып табылады.

«Микроқаржылық қызмет туралы» ҚР Заңы 3-бабының 1-1-тармағына сәйкес микроқаржылық қызметті жүзеге асыруға лицензия ломбардтарға жеке тұлғаларға жеке пайдалануына арналған жылжымалы мүлкін кепілге қойғыза отырып республикалық бюджет туралы заңда тиісті қаржы жылына белгіленген айлық есептік көрсеткіштің сегіз мың еселенген мөлшерінен аспайтын мөлшерде бір жылға дейінгі мерзімге микрокредиттер беру құқығын береді.

Бұдан басқа, «Микроқаржылық қызмет туралы» ҚР Заңы 3-бабының 1-3-тармағына сәйкес ломбардтар бағалы металдар және асыл тастар бар зергерлік бұйымдарды есепке алуды, сақтауды және сатуды жүзеге асыруға құқылы.